[轉載]蘋果日報：愛國青年有 SO

2009年09月28日 (蘋果日報)

十．一活動浪接浪，噚日港島區由朝到晚都係巡遊、步行，但原來咁都仲未行夠，下禮拜六中秋節仲有壇「香港各界青少年慶祝中華人民共和國成立 60周年萬人大巡遊」，淨係個名都已經長過水蛇春，你叫啲後生仔邊有興趣同你癲。但好彩，祖國而家有米，要激發青少年愛國情操，自然冇難度。

行一個下晝有禮物收

當年六七暴動土共就話慨嘆愛國有罪啫， 家陣回歸咗，香港都由共產黨揸 fit囉，唔止成年人爭住認愛國，後生仔只要參加上述嘅 10月 3日大巡遊，就可以現兜兜有禮物收，唔好講話愛國有理啦，直頭係愛國有 so呀！同西環關係密切嘅港大研究生會 PGSA，近日就向同學發出電郵，話參加呢個巡遊者，會獲得 50蚊嘅禮物同抽獎機會。
八方以為，內地先要透過啲單位組織群眾去參加官方活動，但 原來香港家都興起呢味嘢，要召集啲人肉佈景板撐場。呢個巡遊喺西九龍圓方商場附近集合，途經廣東道、梳士巴利道去香港體育館為終點，巡遊後完成點綴歌舞 昇平任務就鳥獸散，預算下午 3點搞到 5點，但中午 12點就要報到，即係搞足一個下晝。

為增加吸引力， PGSA會安排免費巴士，接送參加者去集合地點。除咗奉上價值 50元嘅精美禮品外，參加者仲可能抽中國慶騷「青春中華」晚會嘅門票，睇到劉華、謝安琪、張敬軒等歌星嘅表演。 PGSA封電郵仲落足嘴頭，話巡遊同晚會注入「健康人生」元素，可以帶出「擁有強健體魄，遠離毒品禍害」訊息，「期望全港青少年繼續為祖國、為香港的富強 而努力！」
雖然呢份愛國熱情咁洶湧澎湃，但一啲仲有獨立思考能力嘅港大生卻不為所動，質疑：「 50元招聘國慶走路工，上街扮演群眾， PGSA花錢請做學生臨記上街巡遊，虛假和諧。」升呢做咗港大研究生陳巧文都睇唔過眼，噚日就喺學校民主牆同 PGSA開拖，大罵呢種送禮谷人去巡遊嘅手法，要 PGSA出嚟交代，呢筆利誘同學參與馬騮戲嘅資金，究竟出自同學仔嘅會費，定係由阿爺資助。八方都有搵過 PGSA方面，不過就未有回應。聽聞呢 50蚊紀念品係大會 T恤同太陽帽，咁落本，八方真係覺得好吸引囉！